Tourenbericht JO Skitourenwoche 2025
Mänti:
Am zäh vor 6i am Morge, hei dr Luca, d'Rahel u d'Salome dr Afang vo dere Wuche gmacht. Zämä si mir mitem Bahnersatz uf Schüpfheim u vo dert mitem Zug uf Luzärn gfahre. Dert simr i nächst Zug wo dr Florian u dr David si derzue cho. Mit dere no chli müede Gseuschaft simir richtig Airolo gfreeset. Ungewäx heimr z Autdorf no d Anna ufgablet u si de nach guete 3 Stung in Airolo ufds Poschi pressiert. Dert het Brünu (Bärgfüehrer) üses Grüppli vervouständiget. Mit angere Gruppe heimr üs i das chline Bössli gmurxet u si de richtig All'Aqua abdüüset. Dert hets di ersti Materiauschlacht gä, u wo aui hei ufgfählet u ahgleit si gsi, heimr üs richtig Piansecco Hütte ufgmacht. Nach ärä guete Stung heimr d Hütte erreicht, uspackt, glunchet, Bindige fertig ihgsteut u schliesslech himeris no einisch ufd Socke gmacht für dr Gerepass z erkunde. Auso het uf üs ä zwestündige ufstig bi starchem Wind und Sunne erwartet. Zwüschdüre hets ä Technikinput zu Spitzcheerinä u Gländebeguetachtig gä. Ufem Pass obe isches wunderschön, chaut u windig gsi, u drum hei mir dert nid lang verwilet. Mir heinis parat gmacht für d Abfahrt u heis richtig chönne gniesse, dür di verschidene Schneeverhäutnis ache z fahre. Zrugg ir Hütte u nachere Rundi schnöizle, hei di Meischte ä Siesta gmacht u dr Luca u d Salome hei d Sunne uf dr Terrasse gnosse. Nachere usgibige Dehnigsiheit vo dene zwüne ure erhousame Siesta vo dä angere himer üs am Tisch ume zämägfunge u Toureplanig füre Zistig gmacht. Nach däm das aui fasch si verhungeret hets am haubi 7i äs herrlechs Znacht gä! (Lasagne :) ) Nach mehrere Rundine schnöitzle simer aui z fride u müed i üser Bettli gschlüffe.
Zisti:
Am Zischti morgä si mir mit em Sunnäufgang losglofä. Äs isch Unfergässläch schön gsi und sicher äs erläbnis wo mä nid so schnäll wirt fergässä. Zersch si mer ä äbäni hindärä glofä, mit dr Sunnä im rüggä hets sächs einiges besser la loufä aus ohni. Wo mir si zum ufstig cho hei mir auso no gnuä kraft gha und är isch rächt schnäll verbi gangä. Mir hei scho denn gmerkt das dr schnee sehr guät isch für dä hang und hei üs gfröit uf dabfahrt. Wo mir ufem pass si dobä gsi hei mir entschidä das dr gipfu bestig meh aus mögläch isch und dä isch aspruchsvoll aber supper gsi. Mit de abfahrt hei mir när no ä schönä abschluss gha.
Mittwuch:
Der Mittwoch startete etwas rau, da wir zuerst von der Hütte Piansecco herunterfahren mussten und dieser Weg steil, eisig und verfahren war. Nachdem wir dies gemeistert hatten, begann der Aufstieg zur Hütte Cristallina. Dieser verlief zuerst angenehm im Sonnenschein, aber danach kam rasch Schnee. Je höher wir stiegen, desto weniger sahen wir. Jedoch konnten wir immer gut genug für den Aufstieg sehen. Nach gemeisterten 1200 Höhenmetern kamen wir in der Hütte an und ließen dort den Tag ausklingen.
Donnsti:
Dii stürmischi Stimmig vo gester isch verbi gsi, drfür isches hüt umso schöner gsi. Üsä hütig Plan isch simpu gsi. Mau uf d Cima di Lago, as paar schöni Schwüng i däm wunderbare Hang ga machä. När luegemir de wiiter. Nacheme reichhaltige Zmorgä heimer zersch as paar Schwüng nizi druss gmacht u när grad agfähllet. D Anna u dr Luca hei dörfä spure u so siemer de ou glii ufem Gipfu gsi u hei dii prachtvolli Bärgwäut gnossä. Nacheme chlynä Znüni uf dr Cima di Lago heimer d Abfahrt i Agriff gno. Mit däm Schnee hetsich dä Gipfu u dii Abfahr richtig glohnt. Aber isch de glich nid ganz rund glüfä. D Salome isch chly a Gränze vo ihrer Beweglechkeit cho u het sich drbi leider z Chnöi verdräiit. Was für sii sehr schmärzvozu isch gsi. So het Brünu nid lang fäderläsis gmacht u dr Heli bsteut. Das super Rettigsteam isch de ou mau da gsi u het sich excellent um üsi Patiäntin kümmeret. Nachere gfühlte Ewigkeit hei sie sie chönnä useflügä u si uf u drvo. D Stimmig isch när so chly bedrückt gsi, Brünu het dii schnäu wieder glockeret u mitteilt, dass mir so söuä wiiterfahrä, das dr Heli nid grad wieder muess umdräiie. Mir hei dä Tag trotz däm so guet wii möglich probierts z gniessä, wüu dä Schnee isch richtig guet gsi. Zudäm heimer glii erfahrä das d Salome scho wieder usem Chrankehüsli entlah isch wordä u dasi daheim a wiiteri Untersuechig darf ga machä. U so isch dä erläbnisrich Tag mit as paar wiitere Schwüng im wunderbare Soulz u einem Fondu z Änd gange.
Friti
Wii jedi Tourewuchä het ou diä dr Letscht Tag. Z Wätter isch nomau super gsi. Üses hütigä Tourezieu isch dr Piz Cristallina gsi u när richtig Bedrettotau achefahrä. Brünu het wiä gäng a super Spur gmacht ka. So het dr d Schlüssusteu mit eifache Mittu entschärft. Dr letscht Teil zum Gipfu isch grad chly stotzig gsi, so heimer unterhalb äs Skidepot gmacht u d Stiigisä ahgleit. När heimer üs wii d Profialpinistä ahgseilet u natürlich dr Rucksack ahgleit. So siemer richtig professionel ufe Gipfu a d Sunne. Dr Junioralpinist hetsich ungerwägs mitä Stiigisä d Hose ghütet. Aber dr erfahrnig Brünu het säubstverständlich äs excellents Reperaturkit mit Dampfbrämschläbi drbi ka. U so sii di Hosä glii gflickt gsi. Nacheme churzä Fotoshooting isch de ou scho wieder a Abstieg. D Gruppe Schwafli womer bereits vor Hütte kennt hei sinis ou scho entgäg cho. D heimer dii Zwöitletschti Abfahrt vo derä Wuchä gstartet u dr letscht Ufstieg i agriff gno. Uf dr Hütte heimer üses Hab & Guet zämmäpackt u no dr übrig Lunch dörfä gniessä. So isch glii di letschti Abfahrt vor üs gstangä. Üsi Heimreis churz zämägfasst: Vom Winter i Frühlig u när richtig Summer. Hüt sii aui Gsung im Tal nidä acho. So heimer d Heireis dörfä ahträtt mit vieunä Erinnerigä im Gepäck u vielech isch dr Eint u Anger sogar chly Müed gsi.
