Montag:
Nachem Usschlafe hei mir üs de bis uf Visp aui gfunge gha. Wo mr de dert o ds richtige Perron hei gfunge, hei mrs schlussendlich de bis nach Ovronnaz gschafft. Dert hei mr no dr Sässelilift gno und somit scho e Stung Ufstieg gspart. Nachem Lunche si mr de losgloffe und churzwiligi zwöi Stung speter si mr de scho ir Cabane Rambert gsi. Knapp bevor mr si acho, si mr aber no vo zwöine überholt worde, wo no 'grad nen Ticken schneller warn'. Nach ere Wuchebesprächig, em ne guete Znacht, em ne churze Seiltechnikinput und em ne läänge Schnöizle hei mr de ner chönne ga lige.
Anna
Zischtig:
Verhäutnismässig stöh mir spät uf. Nach sportleche 40min si mir bereit, d'Tour ufe Grand Mouveran z'starte ! Vouer Vorfrüüd erreiche mir dr Iistieg, leider i chriisdickem Näbu, so dass mir üs d'Walliser Aupe haut hi müesse iibiude. I ziemlech guetem Feus mit wenige stiischlegige Steue chlättere mir am Himmu empor, imne Schwierigkeitsgrad, wo mir üs ide Finke am wöuhschte füehle. Dr Tüüfblick blibt üs bis auf Weiteres vergönnt. Was mir zu däm Zytpunkt no nid wüsse: dr Näbu blibt üse tröi Begleiter für die Wuche. Vou im Zytplan überquere mir die Arête de Saille u gniesse drufache z'Gipfugfüeu. Dert verköschtige mir üs mit weni Lunch u mit Marschtee, wo mir drinne Flöige u angeri suspekti Sache finge. Öbs ä Proteinshake, Tee du muche oder süsch öppis gruusigs isch, blibt umstritte... Dr Abstieg isch nid auzu schwierig u o nid läng, brucht aber nomau voui Konzentration vo aunä, da mir üs i Stuefe 1 Gländ befinge. Guet gluunt u happy mitem Erläbnis vo hüt si mir pünktlech ufe Chueche zrugg ir Hütte, bespräche d'Tour u plane füre nächscht Tag. Einigi vo üs ergäbä sich de zuegheiende Uge, während angeri mit Rotwii Fränzu über abgsaagti Hääge i sanierte Route diskutiere.
Rahel
Mercredi:Mir si'' lève-tôt'' gsy - so isches uf de Sitzpouschter vo de Schämeli gstange - immerhin im Verglych zu de angere Hüttegest. Äs het am haubi sächsi Zmorge gäh u de sy mir losgwanderet Richtig Pacheu. Vor der Hütte sy d Gian's und Giachen's am Grase gsy u hei sich nid gross vo üs la drusbringe. Ufem Pacheu hei mir üs grüschtet für ufe Grat, d Arête vierge. Der Silvan isch ganz inspiriert gsy vo dere verwunschene steinige u wiude Landschaft u het üs us de Gschichtsbüecher vo Muveran verzeut, über di ominösi Epoche vom Goldrausch vo Muveran u vo de Superböck. So het üs d Zyt wider ufghout wo mir bim Zuestig gspart hei. Mir sy de losgchlätteret u hei dä luftig Grat ungloublech gnosse. Leider hets de o ufem Gipfu, Tête a Perre Grept, zimlech viu Wulche gha, dass mir üs d Walliser Alpe hei müesse vorstelle. D Abseilerei isch guet gange, mir hei vo de vor Luftrettig abrachte Reflektore bi de Stäng nid müesse Gebruch näh und sy speditiv ungerwägs gsy. Der versteckt Stang het de d Annina gfunge. Äs het gchuttet u gschrisse aber Mänu het immer no T-Shirt-Wätter gha. Die zwe obe üs hei Steine acheglah, das hätte mir nid mau z achte höch z Stang bracht. Nach steilem Abstieg, aui unversehrt bir Cabane Plan Névé, sy mir o scho vo de beide ''Gardiens'' i Empfang gnoh worde - si sy öppe nüni gsy u hei 'Auphorn' und Samurai gspiut. ''Konichiwa'' und ''engagé'' hets tönt u de si de o der Silvan und der Lukas plötzlech ''engagés'' gsy... U di vier Buebe hei mit Houzschwärt gfochte bis dass Wort wi ''petites filles'' gfaue sy u de isches irgendwenn z viu worde... Zum Znacht hets Stocki gäh - vo däm hei die wo im KiBe gsy sy us ominöse Gründ nümm es zwöits mau gnoh. Nach emne wunderschöne Sunneungergang mit Blick ufe Gänfersee sy mir ga schlafe - dä Tag isch ''le marteau'' gsy!!
Annika
Donnsti:
Hüt morge hei mir mau chli dörfe usschlafe bis am 7i, wüu mir e chürzeri Tour aus di letzte Täg planet hei. Nacheme guete Zmorge mit Nutella u Ovi hei mir dr wiis-blau-wiis Wanderwäg zum col des chamois nord in aagriff gno. Ufem Sattu hei mir üs agschirret u si de ä abwächsligsriichä Grat ufe pierre q'abotse ufegaggeret. Sunnebeschine hei mir ufem Gipfu när ä Pouse igleit, bevors wiedr ufe col derab gange isch. Wiedr dert acho, hei mir d Seil zämä gno u si is refuge giacomini abgstiege. Aus Abschluss vo dere Tagestour hei mir no e Chueche wöue nä, wo mit bitzli Verspätig u es paar 'désolés' de o sehr fein isch gsi.
Jan
Friti:
Am Morgä simer am 7.45 vor Refuge Giacomini gstartet für ga nä Merseillängi z'Chlättere. Nam Hütewart hätme na 45min am Ort söuä si. Na öppe 1.5h sueche u über Gemschwägli lufe himers ufgä mit Sueche. U si de am super Schrattechauch ga Sportchlättere das giht o bi Rägä. Vorem nächste Räge simer ume richtig Giacomini für Chueche u Kaffi. Wo d'Chlider du ume chli trocke si gsih simer Richtig Solalex i d'Refuge du Mirroir.
Mänu
Samsti:
Scho isch dr letscht Tag vor Tourewuche u mir hei nomau grosses vor. D'Mirroir de l'Argentin, üses Ziel, gseht troche us u mir mache üs ufe Wäg a Wandfuess. Dert wird zwäggmacht, d'Bärgschuhe mite Finke gwächslet u sofort i eini vo dene beide Route womer am Abe vorhär hei usgläse igstige. Lücku het ke Wurst meh im Lunch gha u so het är bim Chääs abhoue no ä Bitz vom Duume wöue abschnäfle. Die Bluetig heimer aber ou no unger Kontrolle bracht u Chlättere isch ömu ou gäng no gange. Womer aui di idrücklechi Plattewand erfougriich si dürstige heimer ufem Gipfu no d'Lunchseck gläärt u nomau Richtig Walliseralpe gluegt, aber no geng isch aues ide Wouke gsi…! Bim Abstieg uf Solalex ache heimer no dr Claude Remy troffe u är het gmeint, iz heigesi grad die schönsti Route vodr Schwiiz we nid sogar no witer umenang ader Mirroir de l'Argentin fertig gsteut. Ds Topo woner zeigt het, het zwar meh wine Schatzcharte usgseh, aber wär weiss, villech ziehts üs ja wider mau dert häre u de mache mir üs ufd Suechi nachdr goldige Linde von Solalex…!:-)
Silvan