Tourenbericht vom 25.02.2023 über d Gitzifurggu
Scho am sächsi si mir im Zügli richtig Lötschetal ghocket. Die Eint oder Angerä hei ä sehr churzi Nacht hinger sich gha u drumm no sehr verschlafä us dr Wösch gluegt. Zum Glück hi mir no meh aus zwe Schtung zit gha zum erwachä, bis mir de öppä am viertuab achti si id Gondlä gschtigä si richtig Hockenhorngrat. Munter si mir mit stetigä Uf - u Abschwüng richtig Lötschepasshütte traversiert. Währenddessä hi mir scho d Bärgä wo i Sichtwiti si xi benennt, dr Triebschnee ahgluegt u churzi Abfährtli chönnä Gniessä. Uf äm Ferdengletscher hi mir de d Fäu montiert u si ganz gmüetlich uf d Gitzifurggu uächäglüfä. Ädu isch dr Karavanä vorus u het, wes stotzig isch wordä, schöni Bödeli i Schnee gschuflet, ds mir mit elegantä Spitzcherinä si uf dä Sattu uächächo. Bi schönschtem Wätter (was mir am Morgä nid hättä däicht) hi mir üsä Lunch gnossä u üs, wi oh d Schii uf d Abfahrt vorbereitet. Ä feschti Ungerlag isch mit liechtem Pulver bedeckt xi u het zu ärä super Abfahrt biitragä. Mir hi schöni krüseleti Spürli i Schnee gfahrä u bevor mir z Leukerbad hi erreicht, no im nä Beizli ihkehrt u d Sunnä gnossä. Mit Bös u Zug hi mir üs de oh schowider uf d Heireis gmacht. Daderbii si mir nid ganz di einzigä xii, wo vom schönä Wallis iz verhangenä Bärnbiet hei wöuä. Am Bahnhof z Visp hei mir fasch chli es indisches ÖV-Feeling überchoo! Änet äm Tunu het sich üses Grüppeli scho langsam wider afa uflösä u aui si glücklech, hüt d Sunnä doch no chli gseh z ha, ihrem Wäg hii gfougt.
Dankä ar Sophie u am Ädu für z Leitä u dr Nadine, Tim, Lorenz für z mitcho.
Simon Hirsbrunner