Leiter: Florian, Lisa und Sandra
Teilnehmer: Luca, Frederik, Sandra, Nadja, Silija, Lina, Lorena und Yanick
Am 8i am morge hei mir üs am Bahnhof ds Langnou troffe u hei scho mau d Seili uf d Reis nach Wilderswil mit em Outo mitgä. Dr Räst isch de Richtig Konolfinge gstartet. Dert hei mir de no Sandra und Nadja troffe und de isch es ou scho nach Thun. Dert het üsi Gruppe erneut zuewachs becho u mir si uf e Bus nach Interlake (Ja, mir si würkli mit em Bus gfahre, das hani zerst o fasch nid chönne gloube). Leider het de de Bus in Interlake verspötig gha und mit hei dr Aschluss nach Wilderswil verpasst. Ds Interlake het ume scho dr Frederik uf üs gwartet und so hei mir de aui zäme die haub stung uf e nöchst Bus gwartet. Vollzählig hei mir üs uf e Wäg is Chlättergebiet Wilderswil gmacht, wo es no e chlini theoretischi Uffrüschig über ds Fädele het gä. Zügig hei mir üs aber a Feuse beghä um die Zit möglicht optimau ds nutze u viu Chlättermeter ds mache. Es si aui motiviert und fliessig am chlättere gsi bis es Zit isch worde zum ga (und es het sowieso afah tröpfele). So hei mir üsi siebä Sache zäme packt und si wieder Richtig Bushaltestell glofe. Am Bahnhof ds Interlake hets de no die verdienti Glace gä u so si mir im überfüllte Bahnersatzbus nach Spiez und vo dert wieder nach Langnou zrüg.