Hüt am 9.9.23 si mer ir Climbox ga Material fassä u de si mer mitem Zug uf Schüpfheim zuuglet. Nähär si mer mit em Poschi hingärä kurfet u so himer aues (inkl. de Migrochäs) müähsam id Hefti bugglet. Dobe hei mer nis de gfragt ob sechs dr Migrochäse uche buggle würkli glohnt het. När hei mer zersch mau Tomatesuppe gschlürfft, di wo no hei möge o äs Flädlisüppli. Vou tanket si mer när ad Feuswäng ga chräsme. Gli isch es jedoch scho Zit gsi für ds Znacht. Usem riesige Topf isch cinque Pi gschöpft worde, bis uf ds letzte Teigwäreli. När si d'Giele ga Steine tröhle ud Meittli hei e chli Steinmandli boue. Nachem wunderschöne Sunnenungergang si mer iche tribe worde fürs Dessert. De isch de Diskussion los gange, ob jetzt Tourebricht gschribe oder gschnäutzlet wird, dass isch e klare fau gsi, es isch gschnäutzlet worde. Mit Widerwiue hei sich de aui bettfertig gmacht u si unger Dechi gschlofe.
Am Sunntimorge het üs dr Wecker vom Tim us dä Fädere tschäderet u de hei mir dr Sunneufgang gnosse. Bevor ds Zmorge het gä, si mir no mau unger Dechi gschlofe. Eis nach em angere si mir de ds Dräcksgässli uche gsecklet u de hei mir im ne tüflische Tempo uf e Hüttebode abgseilet. D Giele si nomau chli ga Steine tröhle u die andere hei ir Hütte znüni gno. Im Aschluss si de au no dür d Höhli jogget u de isch es ume scho wieder Zit gsi ds lunche. Nach em Lunch hei de üsi Ruckseck gliechtet. De hets no e churzi Theoriestung gä u so isch es scho ar Zit gsi zum hütteputze und abeloufe. Bim Brunne hets de no e feini Verpflegig mit Rivella und Schläckzüg gä.
Teilnähmer: Tim, Fabio, Thomas, Finja, Yolanda, Mikhael, Jana, Daniel, Romina und Finlay
Leiter: Ädu, Sandra und Karin
