JO: Einsteigerhochtour Ferdenrothorn Nordgrat

Am Samschtig hei sich dr Luca, Noah u Samuel z Langnou City uf em Gleis 2 troffä. Speter ds Signou isch no d Salome derzue gstossä, hets aber bis uf Chonufingä nid gschaft di drü angerä ds fingä. Wägemnä tragischä Zwüschäfau, het dr Gittarämichu ds Thun kes Sandwich chönnä kömerlä. Im bumbsvouä Zug sie mir du de komplett (mit zwöi witerä Zuestiger) uf Kanderstäg greist. Mitem Aupätaxi si mir uferä unbefestigtä Strass nach Seldä gfahrä. När si mir dr Bärg düruf gschuänet. Dr Rafi het ungerwägs ds ungerhautsamä Gschichtli vom rosärotä Bäueli verzeut (wär kennts?) u de si mir o scho ufem Lötschäpass obä gsi. I dr Lötschepasshüttä hei mir no d Seilverchürzig glehrt und üs ufä nächscht Tag vorbereitet. Am nächschtä Morgä simer de über nes grosses Schneefäud richtig Gizzifurgu gloffä. Dert heimer aui Chlättersachä agleit u si überä Grat ufs Ferdenrothorn gchlätteret. Dobä ufem Gipfu het Gittarämichu d Gittarä fürä gno u s Liedli gspiut. Immer no guet im Zitplan heimer nis ufä Wäg abwärts gmacht. Über d Schneefäuder achä grütscht u dür charigi Gröufäuder simer glüfä. Viu het nümme gfäut u scho si mer ds Ferdä gsi und mitem Bus Richtig heizuä. 

Das isch äuä di erschti Gittarräüberschrittig vom Ferdenrothorn gsi...

Teilnehmer: Luca, Noah, Samuel, Salome und Rafael

Leiter: Michu, Rebekka