JO: Skitourenwoche

JO Skitourenwoche 17.-21.4.2023, Rotondo + Maighels

 

 

Mäntig

 

Es isch einisch im Jahr 2023 im Apriu, wemers gneuer wei wüssä dr 17 Apriu a schönä Frühligstag gsi. Da het sich äs Grüppli ufä Wäg richtig Realp gmacht. Bi dennä 'vielä' Meter Schnee hei mir d Schii trotzdäm gschulteret u si flott gstartet. Wo dr Schnee sich glich noh het wöuä zeige heimer d'Schii agleit u losglüfä.  Diä erstä Chleidigsstück sii de schnäu i Rucksack gflogä. Mit regumässigä Pöiseli sie mir am Zieu schleichend necher cho, es hetzech aber hartnäckig hinger de Feusä versteckt.  Womer de mau as paar Hüttli het gseh, isch de das leider noh nid ds eigentlichä Zieu gsi. D Sunnä hetnis mitdr Ziit immer meh uf dä Schii la schmorä. U womir de fasch gaar sii gsi heimer de doch noh äs Hüttli gseh. Bir Rotondohütte acho, heisich aui über öbis z Trinkä gfröit. U wo de aues veruumt isch gsi, hetz öbis Znacht gä u dir chöit üs gloubä, z bestä womir je hei ka. U nacherä sackstarchä Rundi Tichu sii aui ufem Hühnerstock im Bett verschwundä.

 

 

Zistig

 

Mitem 10 vor sächsi Wecker gweckt, si mir ufgstande und hei üs gstreckt. Äs paar si schneuer ufgstange, die angere no um ire schlaf am bange, doch am Schluss si mir aui am 6i ghocket bim Zmorge vouer Sorge, öb mir de dr Gipfu werde erreiche, statt ir Hütte umezseiche. Miter Sunne im Rügge simer gstartet, hei immer wieder gwartet, und d'Ussicht gnosse, wo sich vor üs het ergosse. Ändlech ufem Leckipass dobe, si aui Problem behobe, mir hei d'Pouse brucht. Doch mir hei natürlech ganz ufe Gipfu wöue, oder söue wöu ds isch ja z'Ziu gsi vo dem Tag. Zerschte mau mit Stigise und Picku los, am Seil vo üsne Bergstiger blos, hei mir üs ufe Weg gmacht zum Chrüz ufem Spitz vom Berg. Z'Panorama igsoge und Vitamine und Sandwiches inebige, si mir baud o wieder abegstige. Ä churzi Strecki hei mir chönne abefahre, u Spure i schnee inechaare, aber dr Stopp isch de schneu wieder da gsi, und d'Fäu hei wieder müesse uf d'Schi. So isch ds no 2 witeri mau gange, es ufe und abe, um dr Gipfu am plange. Und de wieder für d'Abfahrt bereit, hei d'Leiter üs no gseit, dasses no witergeit. Aber mitem Humor vo üsne Leiter, isch ds nur e Spass gsi u mir Junge wieder heiter. So heimer mit schlechter Sicht, im Hingergrund dr Tuurebricht, d'Abfahrt bis zur Hütte gmeischteret. Dört äs Bierli oder eifach Tee zur erfrüschig trunke, u dank üsne schöne aber asträngende Tuure ou langsam chli gstunke. Mit Tichu und schnöuzle hei mir üse Tag glücklech und erschöpft beendet, bis üs D'Leiter hei itz Bett gsendet.

 

 

Mittwuch

 

Liebi Muetis, Liebi Vatis

 

Am 19.4. simer mau wieder am 20 vor sächsi ufgstange, emu dr Pfadigänger vo chli disziplinierter isch aus dr Räscht vor Crew. Da hüt üse letscht tag ir Rotondohütte isch gsi hei mir üse Rucksack scho ganz müesse packe. Nachere erschte churze cherblete Abfahrt, hets d'Sofi scho gschnätzlet und derbi isch ihre rucksack kapputt gange. D'Sofi seuber isch zum Glück ganz blibe. Nachdem mir üses Depot gmacht hei und d'Harschise gsattlet hei simer im chüele Schatte vom Lucendro ufegloffe. Ganz vor dr Lukas oder ou flitzer gnennt, isch em Brünu dicht uf de Ferse blibe während dr Silu dr Besewage gspiut het. Nach x Spitzcherine simer fasch ufem Gipfu gsi. Di letschte Meter heimer zfuess i Agriff gno. Ds Panorama ufem Lucendro isch sackstarch gsi. Nacher dr Brünu vorus simer ä chli witer abe aus planet wär gsi was chli ä mentali Challenge isch gsi. Aber nachere witere Stung simer de ume ufem Pass gstange und si bis zum Schneeendi abegsuuset. Da es aber glich no äs paar Kilometer si gsi bis zum Bahnhof heimer üsi Schi ufe Rügge gno wöu di Clöwn üse Schnee vor Strass hei freeset. Bim Bahnhof acho hets no ä Erfrüschig gä im Restaurant und hei de när dr Zug uf Hospental gno wo üsi Jugi 'direkt' näbem Bahnhof isch gsi. Ä einmaligi erfrüschendi Duschi het üs dört erwartet und am abe simer mit Birkestöck id Pizzeria ga esse. Nachem Esse hets no wi gwöhnlech äs paar Rundine Tichu und Schneutzle gä bis mir is Bett si und 10h gschlafe hei.

 

 

Donnsti

 

Dr Tag het zum erschte mau wätterbedingt mit usschlafe gstartet. Ir Jugi hets äs flotts Zmorge gä mit auem drum u dra. Churz drufabe heimer dr Zug gno ufe Oberauppass u si vo dört us ufs 'Näbuhorä' ( eigentlech Pazolastock) gloffe, äbä im dichte Nebu. Obe hetme uf dr einte site ds Wouchemeer gse uf dr angere site ds Nebumeer und gege di letschti site gar nix mehr. Oni jeglichi Sicht het üs dr Silu mitem Kompass sicher abegfüehrt o weme mängisch nüm het gwüsst obme forwärts, rückwärts oder gar nid fahrt. I der Flächi acho isches wieder Zyt gsi d'Fell azbinde und dr Ufstig zur Maighelshütte azga. Ä zügige Wind und ä chle Schneefau hei üs dr Wäg erschwert aber mir si de doch einisch ir Hütte acho. Ir Hütte heimer üs breit gmacht u wie immer tichlet und gschnöitzlet bis zum geht nicht mehr. Ds Znacht isch super gsi und gli druf abe simer ou scho wieder itz Bett damit mir si fit gsi füre Friti.

 

 

Friti

 

Am Morge ischs no chli vrhanget gsi, aber dr früsch Pulverschnee wos über d'Nacht het gä het üs zur Hütte us glockt. So si de d'JO Langnou ou die erschte gsi, wo ufde Lattene si gstange u richtig Piz Cavradi gspuuret si! Ä wunderbari Pulverschnee abfahrt (wie no fasch keni i däm Winter) het üsi Skitourewuche abgrundet. U so isch de dr churz Ufstieg zrügg zum Oberauppass ganz ring gange! D'MGB het üs de wider dürds Goms ab scho fasch i Summer bracht u die einte oder angere länge Ungerhose si langsam fürig worde!

 

Sofia, Luca, Lorenz, Silvan, Bruno