JO: Skitourenwoche (B)

JO Skitourenwoche 2024 Grialetsch Kesch

 

Teilnehmer: Anna, Sarah, Luca, Lukas

Leitung: Brünu, Silvan

 

 

Mänti

 

Am Mänti himer üs Zit gla. Da di erwartete Temperature der Ufstig id Grialetschhütte hätte la e Tortur wärde, himer der Plan gänderet u si du ersch ufe Namittag bis ids Sertig-Dörfli ob Davos greiset. D Aktivitäte im Schnee himer ufenes Minimum begränzt u si bloss ä Haubstung vor Ungerkunft wäg ga Lawinerettigsusbildig trainiere. 

Der Räst vor Zit himer bimne Schnöizli-Turnier uf Olympia Niveau üs uf di folgendä Täg im Schnee gfröit. (Lukas)

 

 

Zistig

 

Im Walserhuus hei mir üs säuber dörfä z'Morgä uftischä, wöu niemer so früech us dä Fädere het mögä wie mir. Am viertu ab 5i si mir vom Sertigtäli losglüfä u hei gli gmerkt, dses nid so fest het abgstrahlet, wie erwartet u ds es geng no rächt warm isch. Mir si zügig vora cho. Churz vor dr Passhöchi hei mir d'Ski ufbundä u so mit dä Stigisä bis ufä Gipfu. Ds Leidhora isch gar nid so leid gsi, mir hei beschtes Wätter chönnä gniesse. Drufabä si mir richtig Dischmatal abgfahrä u vo dert gmüetläch id Grialetschhütte ufgstigä. Z'Wätter het säch när verschlechteret u es het gäge Abä afa schneiä. (Sarah)

 

 

Mittwuch

 

Bi Neuschnee u mängisch meh u mängisch weniger Wind si mr us dr Grialetschhütte us. Dr Brünu het üs de e gueti Spur präppet u de si mir da Kurve um Kurve höcher gstige, immer witer am Näbel entgäge. Es isch de immer chälter worde u d Sicht immer schlechter. Dr Piz Grialetsch hei mr rechts la lige u si stattdesse uf ds Scalettahorn. Je witer dass mr ner si abe cho desto wärmer isches worde. Dr Gägeufstieg id Keschhütte isch de bim chläbrige Schnee no fasch chli müehsam worde. Derfür het üs ner e gmüetlichi Hütte erwartet. (Anna)

 

 

Donnsti

 

Hüt hi mir brönschet. So chli Müsli u Brot u Chääs. Aber früech uf simer igentlech wägem super mega guete Wätter. No grad miter Stirnlampe simer di erste paar Meter vor Hütte furt cho. Ä gueti Stung speter het üs du ufem Porchabella-Gletscher d Sunne begrüesst. So um Znüni Zit simer vom Skidepot ine lustegi Chlätterei ar Ost-Wand vom Piz Kesch gstartet. Bi immer wermerä Temperature simer dür di änge Couloir u stozige Schneefäuder am Gipfu zue. Nachem rassigä Fuessabstig hei mir bi bestä Pulververhältniss uf dä Ski üsi Bögä zogä. Üsi wunderschönä Spurä hei mir dr ganz Nami vor Hütte us chönä bestuunä wärend mir ä feini Rösti gässe u vo witere Abfahrtä tröimt hei. (Lukas)

 

 

Friti

 

Es het mau wieder uf diä föifä Zmorgä gä. Da mir afang chly ir Üebig sii gsi, sii aui schäu parat gsi. Im Schiin vor Stirnlampä hei mir d Abfahrt i Agriff gno. Diä isch aber oh gleitig für bi gsi u de sii d Fälli oh scho wieder ufdä Ski gsi. Nach as paar churzä Stopps u einsch Harschiisä drufduä, heimer de ds Top (Passhüreli) erreicht. D Sunnä het aues wunderschön beleuchtet u de siemer diä rästlichä Meter i dä spurä vo Silä z Fuess zum Gipfu ufä. Nacheme Fotoshooting u Usicht gniessä siemer wieder zrüg ids Skidepo. Jz hätemir gmüetlich d Abfahrt chönnä machä u hei reisä, da das aber bau schad wär gsi u aui no chly hei mögä, siemer no ufs Augstenhöreli. Z letsch mau d Ussicht gnossä heimer d Abfahrt i Agriff gno. Kartontechu, chly Powder, Sulz, het ömu fasch aus drbi ka. Im Walserhuus hets no grad uf z früechere Postauto glängt u so hei mir üs ufä heiwäg gmacht mit lustigä u schönö Erläbnis. (Luca)