JO /KIBE: Pfingstklettern Hefti

Am Samstimorge hei mir üs i de Climbox troffe um ds Materiau u Ässe ds fasse und uf üsi Ruckseck ds verteile. Am viertu vor 9i si mir de los in Richtig Bahnhof u de uf e Zug i Richtig Schücpfheim. Dert hei mir de no uf ds Poschi gwächslet nach Söreberg Hirsegg. So si mir ume losglofe u hei bir Bodehütte e verdienti Pouse gmacht. Bim erklime vo de Schratteflueh isch es de cho Niesle, aber das isch e schöni Abchüelig gsi. Obe acho hei mir de gmerkt, dass es no viu meh Schnee het aus letsts Jahr u mir hei sogar es paar Murmeli gseh. Nach ere churze Pouse hei mir üs de parat gmacht zum Chlättere und hei üsi Ruckseck im Schärme vo de Hütte deponiert. I Zwöi Gruppene hei mir de nomau die wichtigste Sache vom Chlättere und Sichere am Feuse agluegt. Zrüg i de Hütte hets de e Chüsischlacht gäh bis es Zit für d'Älplermagaroni isch gsi. So si mir vougässe u ds'zfride ga schlafe. 

Am Sunnti hei mir spät am morgä es Zmorge gnosse. derbi isch ds Ovo Crunchy scho fasch läär worde. D Leiter hei üs de us dr Hütte gjagt, i Richtig grossi Nadlä. Meh oder weniger schnäu si de die Seilschafte ufä cho. Zitat Flöru: Dr Fabio hani eigentlich ufähzoge, Beteiligung vo ihm 0%. Ufem Gipfu hei sich de aui abgseilet und si vor Sandra am Bode in empfang gno worde. Leider si de doch no dicki Rägewouche ufzoge u es het für die zwöi Leiter no e chlini Duschi gä. När hets Zmittag ir Hefti gä, wo plötzlich e Gast erschinä isch. Är het eifach die erwünschti Glace vergässä. Wo dr Feus de wieder troche isch gsi, siemer no mau ga chlättere, ussert de Fabio, dä het dr Pinguin bevorzugt. Dr Tüfeler isch de ohno gmacht worde, mit chlättere oder säubstufstig. Znacht isch de ufzmau o scho nache gsi. Während dere Haubstung Tourebricht schribe het dr Fabio fängs afa d Löffle abgwäsche gha. Dr Sunnäungergang hei mir üs natürlich oh nid chönne lah ergah (ussert dr Fabio, dä het witer wöue abwäsche). Zrüg ir Hütte hets de no es paar Rundine enang alüge bim Meiere gä. Guet Nachts liebs Tagebuech, bis morn. 

Am Mänti si mir no speter ufgstange u hei derfür de scho dusse chönne Zmorge ässe. Aschliessend hei mir üs für ds chlättere grüstet u si Seilschaft um Seilschaft ds Dräcksgässli deruf und hei uf e Hüttebode abgseilet. Leider isch es de scho ums zämerume gange, d'Hütte isch putzt worde und mir hei no aues Ässe versuechts verputze wo isch übrig gsi. So hei mir üs a Abstig gwagt u si derbi chli verrägnet worde. Rächtzitig si mir de unge acho u hei is Poschi und dr reserviert Zug chönne hocke. So si aui gsung und d'zfride wieder in Langnou acho.