JO /KIBE: Pfingstklettern Hefti

Tourenbericht Pfingstklettern Hefti 07.06 – 09.06.2025

Samsti:

Am Samstigmorge hei mir üs ihr Climbox troffe. Mit de Bösse si mir de richtig Hirssegg. Doch de Buschauffeur het üs so gärn ga, dass er üs gar nid wöue use la. Wäge däm hei mir es Stück wieder müsse zrüg loufe. Ob em Bodehüttebord hei mir de üse Lunch uspackt. Nach äre usgibige Pouse sie mir witer glüfe u si aui zfride u troche dobe a cho wobi 2/3 vo üsne Leiter rächt müed sie gsi, aber nid wäge üs! Wiu z Wätter nid so schön isch gsi u mir no uf e Nachzügler gewartet hei, wo speter los glüfe isch, het Florian es Mittagsschläfli gmacht u mir hei gschnöizlet. Wo’s het afa hagle hei mir no bsuech übercho, es paar vom Wätter überraschti Gäst. U de isch o no üse Nachzügler, dr Tobias, plätscht-pfludi nass acho. Für ihn wär e Regenschirm guet gsi, aber dä het äbe scho d’Rahel mit gno mit ihrem Raketerucksack. Wiu z wätter eifach u eifach nid het wöue besser wärde, hei mir de Theorie fürs Abseile u z Fädlä vor dr Höhli im Schärme gmacht. Das isch eigentlich guet gange bis de d’Alea bim fädle dür ihri säubstsicherig gfädlet het. u näs Eigegou gmacht het. Zum Znacht hets Älplermagaroni ghä u für d Elin u Alea Spagetti mit Tomatesosse. Am Abe hei mir no gschnöuztlet u gmeieret. När sii mir i ds Bett gange u si drufabe glii igschlafe.

Sunnti:

Am Sunnti sie mir früsch u munter erwachet u hei zerscht Mau zmörgelt. Da hei mir schnäu gmerkt das ds Wätter nid viu besser isch worde. Deswäge si mir no chli ihr Hütte blibe. Wos de när ä chli ufta het, si mir hingere ga chlätterä. Wos zit isch gsi hei mir zmittag gässe u si näher a die grossi Nadle ga chlätterä. Eigentlich hei mir ou uf die chli Nadle wöue chlätterä aber mir hei d Route nid gfunge. När himer äs Teamprojekt startet wo jedä a weitere Express ghänkt het. Wo mir näre si fertig gsi, hei mir d’Gfüeu ga, dass mir no it Höhli wei. Ihr Höhli acho, hei mir die schöne Höllewäng u Höllegäng bewundert. Us dr Höhli dusse isch z'Wätter endlich e chli besser gsi. De isch es wieder ad Theorie gange, das Mau zum Thema Mehrseillengine. Dert hei mir üs entschiede, dass mir gar nid Abseile u abe gumpe. Oder nume a eim Seili abseile, oder bis it Mitti abseile. Mir hei gfunge das mache mir normaler wiiss nid so, drum wärs schlau d’Übige abschaffe, wüs viu gfährlecher isch. De hets de scho gheisse das ds feine Tomaterisotto fertig isch. So heissech aui abgseilet u schnäu a Tisch ghocket. Wo ds Ässe verschluge isch gsi, hei mir e Rundi UNO gspiut. Elio, Flöru u Tobias hei no bim Tüfeler Säubstufstieg gmacht u vo dert dr Sunneungergang bewundert. Di wo UNO hei gspiut si de ono ga dr Sunneungergang luege. Doch d’Sunne isch scho fasch dunge gsi, wo mir si Dusse gsi. Drum si mir schnäu wieder iche gange, ga Gützi ässe. Am Tisch isch no gredt worde u de si mir gli itz Bett.

Mänti:

Am Mänti hei mir de ändlich bi schönem Wätter dusse chönne zmörgele. -bim ufrume und parat mache zum chlättere isch de e Teil vor Muur vor dr Hütte abbroche und het es Loch hingerlah. Nach däm Schreck hei mir üs aber de trotzdäm parat gmacht zum chlättere und hei üs i zwöi Gruppe ufteilt. Die einte si düre Ostriss düruf u die andere ds Dräcksgässli. Obe het me sich de wieder troffe und gmeinsam uf e Hüttebode abgseilet. Aschliessend hei no aui versuecht möglichst viu Lunch ds ässe, damit er nid abetreit muess wäre, d’Hütte isch putzt worde und mir hei üs uf e Wäg in Richtig Hirsegg gmacht. Ds Abeloufe isch sehr ring gange sodass mit i angerhaub Stung dunge si gsi.